"പുണ്യാളൻ -2 മലയാളത്തിലെ, നായികയില്ലാത്ത ആദ്യ കമേഴ്സ്യൽ ചിത്രം'

Home |

Editorial |

Leader Page Article |

Local News |

Star Chat

"പുണ്യാളൻ -2 മലയാളത്തിലെ, നായികയില്ലാത്ത ആദ്യ കമേഴ്സ്യൽ ചിത്രം'

സമകാലിക രാഷ്‌ട്രീയ സാമൂഹിക സംഭവങ്ങളെ നർമത്തിൽ ചാലിച്ച് അവതരിപ്പിച്ചുവെന്നതാണ് ജയസൂര്യ നായകനായ രഞ്ജിത് ശങ്കർ ചിത്രം പുണ്യാളൻ പ്രൈവറ്റ് ലിമിറ്റഡിന്‍റെ (പുണ്യാളൻ -2)വിജയരഹസ്യം. ജനങ്ങൾ ഉറക്കെ വിളിച്ചുപറയാൻ ആഗ്രഹിച്ച വർത്തമാനകാലത്തിന്‍റെ പല യാഥാർഥ്യങ്ങളെയും ആകുലതകളെയും കലർപ്പില്ലാതെ അവതരിപ്പിച്ച ജോയി താക്കോൽക്കാരനെ ജനങ്ങൾ ഏറ്റെടുത്തിരിക്കുന്നു. മലയാളത്തിലെ നായികയില്ലാത്ത ആദ്യത്തെ കമേഴ്സ്യൽ ചിത്രമാവാം പുണ്യാളൻ പ്രൈവറ്റ് ലിമിറ്റഡ് എന്നു രഞ്ജിത് ശങ്കർ. പുണ്യാളൻ -2 വിജയകരമായ മൂന്നാംവാരത്തിലേക്കു കടക്കുന്പോൾ സംവിധായകൻ രഞ്ജിത് ശങ്കർ ചിത്രത്തിന്‍റെ രചനാപശ്ചാത്തലത്തെക്കുറിച്ചു ദീപിക ഡോട്ട്കോമിനോടു സംസാരിക്കുന്നു.....

വിജയരാഘവൻ അവതരിപ്പിച്ച ശക്തൻ രാജശേഖരൻ എന്ന മുഖ്യമന്ത്രിക്ക് കേരള രാഷ്‌ട്രീയചരിത്രത്തിലെ ചില നേതാക്കളുമായി സാമ്യമുണ്ടല്ലോ..?

ഒരാളെ വ്യക്തിപരമായി ഉദ്ദേശിച്ചല്ല ആ കഥാപാത്രത്തെ സൃഷ്ടിച്ചത്. ഒരുപാടുപേരുടെ ഒരു റപ്രസന്‍റേഷൻ എന്ന പോലെയാണു ചെയ്തത്. അതിനെ കുട്ടേട്ടൻ(വിജയരാഘവൻ) എന്ന ആക്ടർ വ്യാഖ്യാനിക്കുകയായിരുന്നു. ശക്തൻ എന്ന കഥാപാത്രത്തെ എങ്ങനെ അവതരിപ്പിക്കാമെന്ന് ഞാനും കുട്ടേട്ടനും കൂടി ചർച്ചചെയ്തപ്പോൾ ഇയാളെ വളരെ സീരിയസ് ആക്കരുതെന്നു തീരുമാനിച്ചിരുന്നു. അയാളെ രസികനായി അവതരിപ്പിക്കാൻ പ്ലാൻ ചെയ്തു. നമുക്കറിയാവുന്ന രസികന്മാരായ ഒരുപാടു നേതാക്കന്മാരില്ലേ? അവരുടെയല്ലാം പല ഘടകങ്ങളും ശക്തനിൽ വന്നിട്ടുണ്ടാവാം. അല്ലാതെ ഒരു വ്യക്തിയെ ആലോചിച്ചല്ല അതു ചെയ്തിട്ടുള്ളത്. വാസ്തവത്തിൽ കുട്ടേട്ടൻ അത് ചെയ്തത് അദ്ദേഹത്തിന് അറിയാവുന്ന ഒരു പ്രഫസറുടെ കുറേ മാനറിസങ്ങൾ കൂടി എടുത്താണ്.

ആ കഥാപാത്രത്തെക്കുറിച്ച് വ്യാഖ്യാനങ്ങളും വിമർശനങ്ങളും ഒരു ഭാഗത്തുനിന്നും വന്നതുമില്ല...?

കാരണം അതു വ്യക്തിപരമല്ല. ഒരു ഫാക്ടിനെയും വളച്ചൊടിച്ചു കാണിക്കുന്നില്ല. വ്യക്തിപരമായി ആരെയും താറടിച്ചു കാണിക്കുന്നുമില്ല.

വിഷ്ണുഗോവിന്ദൻ അവതരിപ്പിച്ച ഗ്ലാഡ്സണ്‍ എന്ന പൂന്പാറ്റ ടിവി റിപ്പോർട്ടറിലൂടെ ചില സമകാലിക ദൃശ്യമാധ്യമപ്രവണതകൾ വിമർശിക്കപ്പെടുകയല്ലേ...?

നല്ല മീഡിയക്കാരുമുണ്ട്. അങ്ങനെ അല്ലാത്തവരുമുണ്ട്. നമ്മുടെ മാധ്യമ സംസ്കാരത്തിനു അടുത്തിടെ വന്ന മാറ്റമാണത്. വാർത്ത കണ്ടുപിടിക്കലാണല്ലോ ഇപ്പോൾ. അല്ലാതെ വാർത്ത റിപ്പോർട്ടിങ്ങ് അല്ലല്ലോ ഉള്ളത്. ആംബുലൻസ് പോകുന്പോൾ അതിന്‍റെ പിന്നാലെയുള്ള ഓട്ടമൊക്കെ നിരീക്ഷിച്ചാൽ വലിയ കോമഡി തന്നെയാണ്. അതിന്‍റെയൊക്കെ ഒരു പ്രതിഫലനമാണ് ആ കഥാപാത്രം.

‘ഇതൊന്നും അതിൽ വരില്ലല്ലോ.. അല്ലേ? ’ എന്നു ജോയ് താക്കോൽക്കാരൻ ചാനലുകാരോടു പറയുന്ന സീനിന് അടുത്ത കാലത്തു സോഷ്യൽമീഡിയയിൽ പ്രചരിച്ച ഒരു സംഭവത്തോടു സാദൃശ്യം തോന്നി..?

അതു യാദൃച്ഛികമായി സംഭവിച്ചതാണ്. ജോയ് താക്കോൽക്കാരന്‍റെ ഉദ്ദേശ്യം പുണ്യാളൻ വെള്ളം മാർക്കറ്റ് ചെയ്യുക എന്നുള്ളതു മാത്രമാണ്. പുണ്യാളൻ വെള്ളത്തെക്കുറിച്ചു പറഞ്ഞശേഷം ഇതൊന്നും ഇതിൽ വരില്ലല്ലോ..അല്ലെ എന്നു ചോദിച്ചാൽ ചാനലിൽ അതുതന്നെ വരുത്താൻ മീഡിയയ്ക്കു താത്പര്യം കൂടുമല്ലോ. അതു വാസ്തവത്തിൽ ഒറിജിനൽ സ്ക്രിപ്റ്റിൽ ഉണ്ടായിരുന്നു. ഷൂട്ട് ചെയ്യുന്ന സമയത്ത് സോഷ്യൽ മീഡിയയിൽ പ്രചരിച്ച ആ സംഭവം ഉണ്ടായിട്ടുണ്ടോ എന്ന് എനിക്കു കൃത്യമായി അറിയില്ല. ആ ഡയലോഗ് ആളുകൾക്കു ജെനുവിൻ ആയി തോന്നിയത് അതു കഥയിൽ കൃത്യമായ സ്ഥാനത്തു വന്നതുകൊണ്ടാണ്. അല്ലെങ്കിൽ അതു മുഴച്ചിരുന്നേനെ. ആ വീഡിയോ ആളുകൾക്ക് ഏറെ പരിചിതമായതിനാൽ ആ സീൻ വളരെവേഗം ക്ലിക്കായി എന്നുമാത്രം.

പല സിനിമകളുടെയും രണ്ടാംഭാഗം ഏറെ വിരസമായി അനുഭവപ്പെടാറുണ്ട്. എന്നാൽ പുണ്യാളൻ -2 പുതിയ പശ്ചാത്തലത്തിൽ അവതരിപ്പിച്ചതല്ലേ സിനിമയെ രസകരമാക്കിയത്...?

വാസ്തവത്തിൽ ഇതൊരു ഫ്രഷ് കഥയായിരുന്നു. വേറൊരു രീതിയിൽ ചെയ്യണമെന്നു വിചാരിച്ചിരുന്ന സിനിമയായിരുന്നു. പക്ഷേ, നായകൻ തൃശൂർക്കാരൻ ആയാൽ അത് സിനിമയ്ക്കു കൂടുതൽ ഗുണപരമാകുമെന്നു തോന്നി. കാരണം തൃശൂർ ഭാഷയ്ക്കൊരു ഗുണമുണ്ട്. തൃശൂർഭാഷയിൽ പറയാനുള്ള കാര്യങ്ങൾ വളരെ ലൈറ്റായി രസകരമായി അവതരിപ്പിക്കാം. നീളൻ ഡയലോഗ് വെറുതേ പറഞ്ഞാൽ ആളുകൾക്കു ബോറടിക്കും. തിയറ്ററിൽ നിന്നു കൂവൽ വരും. സിനിമയിൽ ആ കാലമൊക്കെ കഴിഞ്ഞുപോയി. നായകനെ തൃശൂർക്കാരൻ ആക്കിയാൽ അതിന് ഇങ്ങനെ രണ്ടു പ്രയോജനങ്ങൾ ഉണ്ടാകുമെന്നു തോന്നി. അപ്പോഴാണ് നായകകഥാപാത്രം എന്തുകൊണ്ടു ജോയി താക്കോൽക്കാരൻ ആയിക്കൂടാ എന്നു തോന്നി. അയാൾ പ്രേക്ഷകർക്കു പരിചിതനാണ്. രാഷ്്ട്രീയപശ്ചാത്തലവുമുണ്ട്. അങ്ങനെ ഒരുപാടു സാധ്യതകൾ തോന്നി. അങ്ങനെ ആ കഥയെ സെക്കൻഡ് പാർട്ടുമായി ലയിപ്പിച്ചുചേർക്കുകയായിരുന്നു.

സ്റ്റണ്ട്സീനുകളില്ലാത്ത ഒരു രാഷ്്ട്രീയചിത്രം എന്ന രീതിയിൽ അവതരിപ്പിച്ചതിനു പിന്നിൽ...?

കാരണം, അത്തരം ഒരു കാലഘട്ടമൊക്കെ കഴിഞ്ഞുപോയി. ഒരു മുഖ്യമന്ത്രിക്കു വേണ്ടി അക്രമ രാഷ്്ട്രീയം നടത്തുക എന്നതിനു യാതൊരു ലോജിക്കും ഇന്നില്ല. എന്നാൽ അധികാരം വേണ്ടരീതിയിൽ വേണ്ട സമയത്ത് ശക്തൻ രാജശേഖരൻ ഉപയോഗിക്കുന്നുമുണ്ട്. തീരെ താണ ലെവലിൽ അക്രമരാഷ്്ട്രീയത്തിലേക്ക് അതു പോകുന്നില്ല.

പുണ്യാളൻ -1 ൽ നൈല ഉഷ അവതരിപ്പിച്ച അനു ജോയി എന്ന കഥാപാത്രത്തെ രണ്ടാം ഭാഗത്തിൽ ഒഴിവാക്കിയതിനു പിന്നിൽ...?

ഒറിജിനൽ ഉണ്ടായിരുന്ന കഥയിലെ നായകനു ഭാര്യയോ കുട്ടിയോ ഉണ്ടെന്നുവരുകിൽ അയാൾക്ക് ഈ സിനിമയിൽ നിങ്ങൾ കണ്ട പല കാര്യങ്ങളും സ്വതന്ത്രമായി ചെയ്യുക ബുദ്ധിമുട്ടാവും. ഭർത്താവു വീണ്ടും ജയിലിൽ പോകുന്നതിനെ ലോകത്ത് ഒരു ഭാര്യയും സമ്മതിക്കുമെന്നു തോന്നുന്നില്ല. തനിക്കു മുന്നും പിന്നും നോക്കാനില്ല എന്നു പറയാൻ കഴിയുന്ന ഒരാൾക്കേ അത്തരം കാര്യങ്ങൾ ചെയ്യാൻ കഴിയുമായിരുന്നുള്ളൂ. അതൊന്നും പരിഗണിക്കാതെ ഭാര്യയെയും മറ്റും ഇതിൽ കൊണ്ടുവന്നിരുന്നെങ്കിൽ അതിനു ലോജിക് ഇല്ലാതെ പോകുമായിരുന്നു. മലയാളത്തിലെ നായികയില്ലാത്ത ആദ്യത്തെ കമേഴ്സ്യൽ ചിത്രമാവാം ഇത്.

പുണ്യാളനു മൂന്നാം ഭാഗം - സാധ്യതയുണ്ടോ....?

അറിയില്ല. പാർട്ട്- 2 എടുക്കണമെന്ന് കരുതി എടുത്ത സിനിമയല്ലല്ലോ ഇത്. പക്ഷേ, ജോയ് താക്കോൽക്കാരനും തൃശൂരും സ്വീകരിക്കപ്പെട്ടു കഴിഞ്ഞതിനാൽ ഇനിയും സാധ്യതയുണ്ട്. പക്ഷേ, അത് ഇപ്പോഴല്ല. നമ്മുടെ നാട്ടിലും രാജ്യത്തും ഇപ്പോൾ നിലനിൽക്കുന്ന ചില സാഹചര്യങ്ങളാണ് ഈ കഥ ഇപ്പോൾ സിനിമയാക്കാൻ എന്നെ പ്രേരിപ്പിച്ചത്. അഭിപ്രായ സ്വാതന്ത്ര്യം, ഫ്രീ പ്രസ് എന്നിവയൊക്കെയാണ് നമ്മുടെ രാജ്യത്തിന്‍റെ ക്വാളിറ്റികൾ എന്നു ഞാൻ കരുതുന്നു. പക്ഷെ, എവിടെയോ ചിലതൊക്കെ നമുക്കു നഷ്ടപ്പെട്ടുകൊണ്ടിരിക്കുകയല്ലേ എന്ന തോന്നലിലും വേദനയിലും നിന്നാണ് ഞാൻ ആലോചിച്ചു തുടങ്ങുന്നത്. അതുകൊണ്ടാണ് ഈ സിനിമ ഇത്രപെട്ടെന്നു ചെയ്യാൻ തീരുമാനിച്ചത്. വൈകിയാൽ ചിലപ്പോൾ സാഹചര്യങ്ങൾ മാറിയേക്കാം. അപ്പോൾ ഈ കഥയ്ക്കു പ്രസക്തി നഷ്ടപ്പെടാം. നമ്മുടെ ഉള്ളിലുള്ള രോഷം കലർപ്പില്ലാത്തതുകൊണ്ടാണ് ആളുകൾക്കും അതു സ്വീകാര്യമായി തോന്നിയത്.

ടി.ജി. ബൈജുനാഥ്

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.