ത്രില്ലടിപ്പിക്കുന്ന സെയ്ത്താൻ

Home |

Editorial |

Leader Page Article |

Local News |

Review

ത്രില്ലടിപ്പിക്കുന്ന സെയ്ത്താൻ

ഭൂതപ്രേത പിശാചുക്കളെന്നു കേൾക്കുമ്പോൾ ഉണ്ടാകുന്ന വ്യാകുലതയെ നല്ല രീതിയിൽ മാർക്കറ്റ് ചെയ്ത നിരവധി ചിത്രങ്ങൾ തമിഴിൽ ഇറങ്ങിയിട്ടുണ്ട്. ആ നിരയിലേക്ക് കടന്നു കൂടുന്ന മറ്റൊരു ചിത്രമാണ് സെയ്ത്താൻ. സൈക്കളോജിക്കൽ ത്രില്ലറെന്ന ടാഗ് ലൈനുമായി എത്തിയ ചിത്രം ഒരു പരിധിവരെ ടാഗ് ലൈനോട് നീതി പുലർത്തി. എന്നാൽ ഒന്നാം പകുതിയിലെ ത്രില്ലിംഗ് മൂഡ് രണ്ടാം പകുതിയിൽ ലാഗിംഗ് മൂഡിലേക്ക് വഴുതി മാറുമ്പോൾ ഉണ്ടാകുന്ന മെല്ലപ്പോക്ക് ചിത്രത്തിന്റെ ത്രിൽ കളയുന്നുണ്ട്. സ്ക്രീനിൽ നിന്ന് കണ്ണെടുപ്പിക്കാതെ തന്നെ ചിത്രത്തെ മുന്നോട്ടു കൊണ്ടു പോകാൻ പാകത്തിനുള്ള ട്വിസ്റ്റുകളൊരുക്കി സംവിധായകൻ പ്രദീപ് കൃഷ്ണമൂർത്തി മിടുക്ക് കാട്ടുന്നിടത്താണ് സെയ്ത്താൻ ഒരു വേറിട്ട ത്രില്ലറായി മാറുന്നത്.

രണ്ടു മണിക്കൂറും നാലു മിനിറ്റുമുള്ള ചിത്രത്തിൽ നായകനായ വിജയ് ആന്റണി തന്നെയാണ് സംഗീതത്തിന്റെ ചുമതല ഏറ്റെടുത്തത്. പശ്ചാത്തല സംഗീതവും കാമറയും ഒന്നിനൊന്ന് മികച്ച് നിന്നപ്പോൾ അതിവേഗം ത്രില്ലർ മൂഡിലേക്ക് ചിത്രത്തെ വലിച്ചടുപ്പിക്കാൻ സംവിധായകന് കഴിഞ്ഞു. ദിനേഷായും ഷർമയായും വിജയ് ആന്റണി സെയ്ത്താനിൽ മികച്ച പ്രകടനമാണ് നടത്തുന്നത്. മ്യൂസിക് കമ്പോസറിൽ നിന്നും നായകനിലേക്കുള്ള ചുവടുമാറ്റം വർഷങ്ങൾക്ക് മുമ്പേ നടത്തിയ വിജയ് ആന്റണിയ്ക്ക് ബ്രേക്ക് ത്രൂ നല്കുന്ന ചിത്രമായി സെയ്ത്താൻ മാറുമെന്ന് ഉറപ്പാണ്.

ഒരു ശബ്ദത്തിന് പിന്നാലെ പായുന്ന ദിനേഷിന് സംഭവിക്കുന്ന മാറ്റങ്ങളിലൂടെയാണ് കഥ വികസിക്കുന്നത്. ദിനേഷിന്റെ ഭാര്യയുടെ വേഷത്തിലെത്തുന്ന അരുന്ധതി നായർ തന്റെ കന്നി നായിക വേഷം മികവുറ്റതാക്കിയപ്പോൾ തമിഴകത്തിന് ഒരു പുതിയ നായികയെ കൂടി ലഭിച്ചുവെന്നു പറയാം.

നോവലിന് സിനിമയുടെ മുഖം നല്കുമ്പോൾ ഉണ്ടായേക്കാവുന്ന പാകപ്പിഴകൾ സെയ്ത്താനേയും ഇടയ്ക്കിടെ പിടികൂടുന്നുണ്ട്. വിജയ് ആന്റണിയുടെയും അരുന്ധതിയുടെയും അഭിനയ മികവും പശ്ചാത്തല സംഗീതത്തിന്റെ ആമ്പിയൻസും കൂടി ഒത്തു ചേർന്നപ്പോൾ ആദ്യ പകുതിയിൽ അത്തരം പാകപ്പിഴകൾ കൺമുന്നിൽ നിന്ന് മറച്ച് നിർത്താൻ സംവിധായകന് സാധിച്ചു. ആകാംക്ഷയുടെ കെട്ടഴിക്കാൻ പാകത്തിനുള്ള രണ്ടാം പകുതി ഒരുക്കാൻ സംവിധായകൻ മറന്നിടത്താണ് ചിത്രം മെല്ലേപ്പോക്കിലേക്ക് ചെന്നു വീഴുന്നത്. കാമറ ട്രിക്കുകൾ പാകത്തിനൊത്ത് ഉപയോഗിച്ച് ഛായാഗ്രാഹകൻ പ്രദീപ് കളിപുരയത്ത് രണ്ടാം പകുതിയിൽ ചിത്രത്തെ വരുതിയിൽ നിർത്താൻ സംവിധായകനെ ആവോളം സഹായിച്ചു.

ഒന്നാം പകുതി ശബ്ദത്തിന് പിന്നാലെയാണെങ്കിൽ രണ്ടാം പകുതി ഒന്നിനു പുറകെ വരിവരിയായ് എത്തുന്ന ട്വിസ്റ്റുകളിലൂടെയാണ് കഥ മുന്നോട്ടു പോകുന്നത്. കുരുക്കുകൾ അഴിച്ചും മുറുക്കിയും ആകെ മൊത്തം കൺഫ്യൂഷനിലേക്ക് ചിത്രത്തെ കൊണ്ടെത്തിക്കാനുള്ള ബോധപൂർവമായ ശ്രമവും സംവിധായകൻ നടത്തുന്നുണ്ട്. പ്രേക്ഷകന്റെ ചിന്തകളെ വഴിതെറ്റിച്ച് തന്റെ സിനിമയിലേക്ക് പിടിച്ചിടാനുള്ള ശ്രമമായി മാത്രം അതിനെ കണ്ടാൽ മതി. പിശാചുക്കൾ ഉണ്ടോ ഇല്ലയോ എന്നുള്ള തർക്കം ഇന്നും നിലനിൽക്കേ ടെക്നോളജിയുടെ മറപറ്റി സമൂഹത്തിന് നാശംവിതയ്ക്കുന്ന മനുഷ്യ പിശാചുക്കളേയും നന്നായി പരിഹസിക്കാനും സംവിധായകൻ മറന്നിട്ടില്ല.

ഒന്നാം പകുതിയിൽ ഒരുക്കിവച്ച കുരുക്കുകൾ ഓരോന്നായി അഴിയുമ്പോൾ കഥ മറ്റൊരു തലത്തിലേക്ക് നീങ്ങുന്നത് ചിത്രത്തെ ഉലച്ചുകളഞ്ഞു. ദിനേഷിന്റെ ജീവിതത്തെ അലോസരപ്പെടുത്തി കൊണ്ടിരിക്കുന്ന ശബ്ദത്തിന് പിന്നാലെയുള്ള പോക്ക് പൂർവജന്മത്തിലേക്ക് ആനയിക്കുന്നിടത്താണ് കഥാഗതി ആകെ മാറിമറിയുന്നത്. പിന്നീട് ദിനേഷിന് സംഭവിക്കുന്ന മാറ്റങ്ങൾ അത്രയും ബിഗ് സ്ക്രീനിലൂടെ തന്നെ കണ്ടറിയുക. അടുത്ത നിമിഷം എന്തു സംഭവിക്കുമെന്നുള്ള ആകാംക്ഷ മുഴുനീളെ ചിത്രത്തിൽ നിലനിർത്തി പോകുന്നതിൽ സംവിധായകന് വിജയിച്ചിടത്താണ് സെയ്ത്താൻ വേറിട്ടൊരു കാഴ്ചാനുഭവമാകുന്നത്. സംവിധായകൻ നെയ്ത വലയ്ക്കുള്ളിൽ അകപ്പെട്ട് ഒടുവിൽ തിരിച്ചിറങ്ങി വരുമ്പോൾ സെയ്ത്താന്റെ കഥയിലേക്കും ഉപകഥകളിലേക്കും ഒന്നും കൂടി സഞ്ചരിക്കാൻ തോന്നുക സ്വഭാവികം മാത്രം.

വി.ശ്രീകാന്ത്

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.